Sniðgöngum Ólympíuleikana

Ef þetta er rétt þá ætla ég ekki að horfa á neinar greinar á Ólympíuleikunum.  Ég veit það breytir ekki neinu þó ÉG horfi ekki, en ekki get ég með góðri samvisku notið þessa atburðar, vitandi það að þúsundir þeirra sem gerðu hann mögulegan hafa verið misnotaðir.  Svo ég sleppi því að horfa, hugsa hlýtt til allra þeirra sem búa við þrældóm í heiminum í dag og bíð eftir mínu tækifæri til að breyta heiminum.

Börn í þrældómi búa til vörur fyrir Ólympíuleikana

ALMENN SKYNSEMI

Er þetta ekki fáránlegt, maður þekkir þetta fólk ekki neitt og veit nákvæmlega ekkert nema það að aumingja fólkið hefur örugglega drukknað (nýbúin að sjá Adrift :) og ég fann sko til í hjartanu í morgun þegar ég las að ekki væri enn búið að finna fólkið síðan í gær.  Var sko alveg viss um að þau væru bara dáin. 

Og svo finnast þau bara á lífi í útilegu eins og ekkert sé og fleiri hundruð manns tilbúnir að hætta lífi og limum til að bjarga þeim frá bráðum bana!  Þetta er algerlega outrageous, það vita það allir að maður hringir alltaf í mömmu þegar maður leggur af stað í ferðalag og svo aftur þegar maður er kominn á áfangastað. 

Svona gerir maður bara ekki og skammast sín svo

Kajakræðarar fundnir heilir á húfi

Jæja Kallinn!

Svona ertu þá!!  Hvar ætla þessir menn eiginlega að draga mörkin?  Meira að segja íhaldssamir eru ekki nógu íhaldssamir

Íransforseti sakaður um ósiðsemi á almannafæri

Sviðin Jörð

Vegna mikillar eftirspurnar hefur hljómsveitin Sviðin Jörð ákveðið að leika fyrir dansi á Sportbarnum í kvöld, en tónleikar sveitarinnar á Pravda á síðasta vetrardag vöktu mikla lukku.  Boðið var upp á grillaða Kebab og orkudrykkinn Burn og var stemmningin eldheit.  Gert er ráð fyrir að tónleikarnir í kvöld veki jafn mikla lukku, enda staðurinn reyklaus orðinn með öllu

Eldur á Sportbarnum

Ég borða rækjur!

Ég skal líka alveg borða oftar rækju ef það bjargar 48 störfum!!  Segið bara til . . . . . .

 Annars samhryggist ég þessum hundruðum einstaklinga sem þarna koma við sögu; starfsmönnunum sem sagt hefur verið upp og fjölskyldum þeirra og einnig, að sjálfsögðu, stjórnendum félagsins sem þurfa að grípa til svo örþrifaríkra ráða sem raun ber vitni. 

 En af því að ég er alltaf svo fjári jákvæð þá leyfi ég mér að benda viðkomandi aðilum, sem þessar línur kunna að lesa, á það að allar aðstæður eru tækifæri.  Það er undir okkur komið hvort við nýtum þessi tækifæri til jákvæðra og uppbyggilegra hluta eða öfugt.

Gangi ykkur öllum vel gott fólk  

48 manns sagt upp störfum hjá Bakkavík í Bolungarvík

Góður þessi !

Þetta er auðvitað algjört prinsipp mál, það væri skömm að því, eftir allt sem á undan er gengið og þann hrylling sem þjóðin hefur þurft að þola á alþjóðavettvangi vegna þessa máls alls, að menn myndu svo bara selja sig hæstbjóðanda. 

Hinsvegar eiga þessir sömu menn að sjá sóma sinn í því að gefa bara þessa blessuðu hvali.  Það er ekki spurning að við eigum að nýta tækifæri sem þetta til að rétta úr bakinu, maður er orðinn ansi hokinn eftir allt þetta áreiti. 

Eitthvað verður samt að gera við þessa peninga og við skulum bara krefjast þess að WSPA kaupi vatnsbrunna fyrir mannskepnur í Afríku fyrir þessar 12 millur, það myndi gera eins og 600 brunna eða svo. 

 Þó að ég sé mikill dýravinur og myndi aldrei gera flugu mein, hvað þá hval, þá finnst mér það mun mikilvægara málefni, að allir jarðarbúar hafi aðgang að hreinu vatni en að það sé nógu mikið af hvölum í sjónum.  Í alvöru, vigtið þetta tvennt; "fullt af hvölum" á móti "hreint vatn fyrir alla jarðarbúa", tekur ekki verulega í vatns megin hjá þér líka? 

WSPA bjóða ríkisstjórninni 95.000 pund fyrir tvo hvali og samning

Halló!

Er ekki lágmark að banka uppá hjá fólki áður en lýst er yfir dauða þess?

 Aulavinnubrögð á heimsmælikvarða

 

Fannst á heimili sínu eftir að hafa verið týnd í fjögur ár

Hér kem ég

Það er víst engin "welcoming committee" á þessum bloggvef svo ég verð bara að gjöra svo vel að bjóða sjálfa mig velkomna.  Svo velkomin ég   Ég er semsagt ný á þessum bloggvef ef það skildi hafa farið framhjá þér . . . . . . 

Verð nú að segja það að mér finnst þetta ferlega leiðinlegt orð; "blogg" og vil hér með óska eftir því að þessi nefnd "hvað-hún-nú-heitir" í Háskólanum eða hvar sem hún nú er og á að finna íslensk orð yfir nýja hluti fari að koma sér að verki og skíri þetta fyrirbrigði sem ég myndi lýsa sem ofurathyglissjúku atferli homo sapiens sem verður að tala og tala þó enginn sé viðmælandinn.  Þetta heilkenni virðist hrjá fólk af öllum "tegundum" meira að segja þá sem hafa atvinnu af því að tala og fá borgað fyrir að vera í sviðsljósinu og láta taka eftir sér; stjórnmálamenn, sjónvarpsfólk og annað slíkt fólk.

Hef sjálf einhvern vott af þessu heilkenni, svo ég læt mig hafa það.  Ég ætla allavega að prófa þetta og sjá hvort ég haldi það út að sinna þessu eitthvað að ráði, ég hef allavega voðalega gaman að því að lesa annara manna blogg og mun eftir sem áður sinna því.